Oʻzbekiston 2030-yilgacha uran ishlab chiqarishni ikki baravar oshirmoqchi
Prezident, shuningdek, muhim xomashyoning yana 11 turini oʻzlashtirishni tezlashtirishni topshirdi
5-noyabr kuni Prezident Shavkat Mirziyoyevga ikki korxonaning rejalari taqdim etildi: 2030-yilgacha uran ishlab chiqarishni ikki baravar oshirish, kritik xomashyo ishlab chiqarish hajmini esa koʻpaytirish rejalashtirilmoqda.
Uran ishlab chiqarish hajmini joriy yildagi 7,5 ming tonnadan 2030-yilgacha 15 ming tonnaga yetkazish koʻzda tutilgan. Buning uchun «Navoiyuran» geologik qidiruv va texnologik burgʻilash ishlarini kengaytiradi, qoʻshimcha sorbsion qurilmalarni ishga tushiradi hamda ishlab chiqarish infratuzilmasini rivojlantiradi.
Taqdimotda texnik oltingugurt, sulfat va azot kislotalarini yetkazib berish masalalari ham muhokama qilindi. 2030-yilgacha sulfat kislotasini almashtiruvchi reagentlar ulushini 40 foizga yetkazish rejalashtirilmoqda. Shu bilan birga, razvedka qilingan uran zaxiralarini 200 ming tonnagacha oshirish koʻzda tutilgan.
«Oʻzbek texnologik metallar kombinati» hozirda volfram, molibden, selen, tellur va reniy ishlab chiqarmoqda. Prezident nikel, kobalt, grafit, surma, qalay, marganets, platina, vanadiy, simob va misni ham oʻz ichiga olgan kritik xomashyoning yana 11 turini oʻzlashtirishni tezlashtirishni topshirdi.
2030-yilgacha kritik xomashyo ishlab chiqarish qiymati 2,7 milliard dollardan oshishi kerak. Volframni chuqur qayta ishlash loyihalari ham alohida koʻrib chiqildi: ular uchun 1,1 milliard dollar investitsiya jalb etish rejalashtirilmoqda. Kombinat joriy yil oxirigacha 12 ta investitsiya loyihasini ishga tushirish va yuqori tozalikdagi selen hamda tellur ishlab chiqarish hajmini oshirishni rejalashtirgan.
