Oʻzbekiston Xitoy kompaniyalaridan benzin va dizel xarid qilish boʻyicha muzokaralar olib bormoqda
AI-92 benzini va Buxoro neftni qayta ishlash zavodi uchun xom neft yetkazib berilishi qishki davrda yoqilgʻi taqchilligi xavfini kamaytirishga yordam beradi
«Oʻzbekneftgaz» Xitoyning CNPC va PetroChina davlat gigantlaridan avtomobil benzini va dizel yoqilgʻisi xarid qilish imkoniyatini koʻrib chiqmoqda. Bu haqda davlat kompaniyasi boshqaruvi raisi oʻrinbosari Farid Muminov maʼlum qildi.
Muzokaralar yuqori oktanli benzin (AI-92 markasi va undan yuqori) hamda dizel yoqilgʻisini yetkazib berishni qamrab oladi. Importning yakuniy hajmlari ichki talab dinamikasi asosida shakllantiriladi. «Oʻzbekneftgaz» Xitoy bozoriga chiqish import kanallarini diversifikatsiya qilish va respublikani yoqilgʻi bilan taʼminlashdagi uzilishlar xavfini minimallashtirish imkonini beradi, deb hisoblamoqda.
Tayyor neft mahsulotlarini xarid qilishdan tashqari, tomonlar Buxoro neftni qayta ishlash zavodi quvvatlarida keyinchalik qayta ishlash uchun neft va gaz kondensati importini oshirish masalasini ham ishlab chiqmoqda.
Uzoq muddatli yetkazib berish va qoʻshma tashabbuslarni jadallashtirish masalalarini «Oʻzbekneftgaz» boshqaruvi raisi Abdugani Sanginov CNPC prezidenti Chjou Sinxhuay bilan uchrashuvda muhokama qildi. Ikki kompaniyaning import shartnomalari, servis xizmatlari va qoʻshma loyihalarni oʻz ichiga olgan umumiy hamkorlik portfeli allaqachon 1 mlrd dollarlik chegaradan oshdi.
