Oʻzbekiston 2030-yilgacha islomiy moliya yordamida qariyb 1 milliard dollar jalb etmoqchi

Markaziy bankning islomiy moliya boʻyicha loyiha ofisi ishchi guruhi rahbari Adhamxon Haydarovning maʼlum qilishicha, taxminan 10 ta mahalliy bank bunday xizmatlarni yoʻlga qoʻyish imkoniyatini oʻrganmoqda.

Regulyator islomiy operatsiyalarni amalga oshirishni rejalashtirayotgan tashkilotlar uchun talablarni belgiladi. Ushbu talablarga javob beradigan banklarga litsenziyalar beriladi, qolganlari esa hujjatlarini takomillashtirib, qayta topshirishiga toʻgʻri keladi. Oxir-oqibat nechta muassasa ariza yuborishi hozircha nomaʼlum.

Sukuk va boshqa islomiy qimmatli qogʻozlarni kapital bozori toʻgʻrisidagi qonun loyihasi qabul qilingach chiqarish mumkin boʻladi. U kuchga kirgach, Markaziy bank ushbu vositalar yordamida bank tizimi likvidligini boshqarish imkoniyatiga ega boʻladi. Ungacha islomiy banklar likvidlik taqdim etishning amaldagi mexanizmlari orqali qoʻllab-quvvatlanadi.

Islomiy moliya toʻgʻrisida alohida qonun qabul qilish koʻzda tutilmagan. Bunday operatsiyalarni amalga oshirish uchun oʻzgartirishlar allaqachon Fuqarolik va Soliq kodekslariga, shuningdek, bank faoliyatini tartibga soluvchi yettita qonunga kiritilgan.