Oʻzbekistondagi mikrosanoat markazlari 7,5 mingta ish oʻrni yaratadi
53 ta markaz belgilandi: ularning faoliyati 400 ta mahallani qamrab olib, kichik ishlab chiqarishni rivojlantirishga yoʻnaltiriladi
Birinchi bosqichda markazlarga muhandislik-kommunikatsiya tarmoqlarini tortish uchun budjetdan 75 mlrd soʻm ajratiladi. 18 ta obyekt maxsus moliyalashtiriladi, yana 35 tasi boshqa manbalar, jumladan, «Yangi Oʻzbekiston qiyofasi» dasturi va drayver loyihalar hisobidan moliyalashtiriladi.
Asosiy yoʻnalishlar tikuvchilik va mebelsozlik, metallga ishlov berish, charm hamda poyabzal mahsulotlari ishlab chiqarishdan iborat boʻladi. Loyiha Prezidentning PQ-49-son qarori asosida amalga oshirilmoqda.
18 ta markaz uchun qiymati 31,9 mlrd soʻm boʻlgan obyektlar belgilandi: ularda elektr taʼminoti, gaz, ichimlik suvi, kanalizatsiya va yoʻllar koʻzda tutilgan. Umuman, muhandislik-kommunikatsiya tarmoqlari uchun allaqachon 35 mlrd soʻm ajratilgan.
