Jahon banki rivojlanayotgan mamlakatlar uchun ilk raqamli strategiyani eʼlon qildi
Ustuvor yoʻnalishlar — aloqa tarmoqlariga ulanish, hamyonbop qurilmalar, raqamli xizmatlar va davlatlarni sunʼiy intellektdan foydalanishga tayyorlash
Jahon banki hisob-kitobiga koʻra, yaqin 10–15 yil ichida rivojlanayotgan mamlakatlarda mehnatga layoqatli yoshdagi yoshlar soni 1,2 mlrd nafarga yetadi. Bu davlatlar iqtisodiyoti esa atigi qariyb 420 mln ta ish oʻrnini taʼminlashi kutilmoqda.
2025 yilda dunyo boʻylab 2 mlrd nafardan ortiq odam internetdan foydalana olmas edi. Rejada tarmoqlarni kengaytirish, qurilmalar va xizmatlar narxini arzonlashtirish, raqamli identifikatsiya hamda toʻlov tizimlarini ishga tushirish, shuningdek, fuqarolar va kichik korxonalarni oʻqitish koʻzda tutilgan.
Bundan tashqari, bank sunʼiy intellekt infratuzilmasini rivojlantirish dasturi haqida maʼlum qildi. Rivojlanayotgan bozorlar mamlakatlari hisoblash resurslarini maqbul narxda olishi kerak; GPU infratuzilmasidan birgalikda foydalanish va undan foydalanish jarayoniga qarab haq toʻlash ham nazarda tutilgan. Dastlab tashabbus Afrika va Lotin Amerikasiga qaratiladi, hamkorlar qatorida Cassava Technologies va Nvidia koʻrsatilgan.
