Oʻzbekiston va Italiya moda brendlari toʻqimachilik sohasidagi hamkorlikni muhokama qildi
Yevropa biznesiga sohaning ishlab chiqarish va eksport salohiyati taqdim etildi
Oʻzbekistonning Italiyadagi elchixonasi Milan shahridagi Ernst & Young (EY) ofisi bilan hamkorlikda toʻqimachilik mahsulotlari eksporti va oʻzbekistonlik ishlab chiqaruvchilarning Yevropa taʼminot zanjirlariga integratsiyasiga bagʻishlangan vebinar oʻtkazdi.
Elchi Abat Fayzullayev hamda Oʻzbekiston Respublikasi Yengil sanoatni rivojlantirish agentligi rahbariyati ishtirokidagi onlayn uchrashuvda jahon moda sanoatining Benetton, Ralph Lauren, Alviero Martini, Frette, Bertolo Cashmere va Gabel Group kabi brendlari vakillari qatnashdi.
Yevropa biznesiga sohaning ishlab chiqarish va eksport salohiyati, shuningdek, «GSP+» rejimining imtiyozlari taqdim etildi. EY ekspertlari Yevropa Ittifoqining ekologik jihatdan maqbullik, sertifikatlash, sifat va taʼminot shaffofligiga doir talablarini tushuntirdi. Tomonlar Italiya kompaniyalarining buyurtmalarini Oʻzbekistondagi fabrikalarda joylashtirish va tayyor mahsulotlarni xarid qilish masalalarini muhokama qildi hamda ikki mamlakat korxonalari oʻrtasida bir qator toʻgʻridan-toʻgʻri B2B muzokaralar oʻtkazishga kelishib oldi.
