Oʻzbekistonda Google Pay rasman ishga tushirildi
Bu haqda bugun Samarqandda Google Cloud vakili Martsin Krasuski maʼlum qildi
Oʻzbekistonda kontaktsiz toʻlovlar uchun Google Pay xizmatining rasmiy ishga tushirilishi boʻlib oʻtdi. Toʻlov tizimi ishga tushirilgani haqida Google Cloud vakili Martsin Krasuski Samarqandda AQSh va Markaziy Osiyo davlatlari diplomatlari hamda biznes vakillari ishtirokida «C5+1» formatida oʻtkazilgan diplomatik va biznes forumi doirasidagi «Raqamli texnologiyalar» panel sessiyasida maʼlum qildi.
Xalqaro infratuzilmaning joriy etilishi kompleks texnik va meʼyoriy tayyorgarlik natijasi boʻldi. Avvalroq Oʻzbekiston Markaziy banki tijorat moliya institutlari hamda milliy operatorlar — Humo va Uzcard ishtirokida kartalarni tokenizatsiya qilish boʻyicha keng koʻlamli ishlarni amalga oshirdi. Regulyatorning maqsadi Visa va Mastercard global tizimlari kartalarini ham, mahalliy toʻlov yechimlarini ham qoʻllab-quvvatlaydigan universal muhitni yaratishdan iborat edi.
