Rossiya neft-kimyo mahsulotlari eksportini uch oyga chekladi
Yangi choralar Yevroosiyo iqtisodiy ittifoqi mamlakatlariga taalluqli emas
Rossiya hukumati Yevroosiyo iqtisodiy ittifoqi hududidan tashqariga neft-kimyo mahsulotlarining ayrim turlarini olib chiqishga vaqtinchalik uch oylik taqiq joriy etdi. Bu chora ichki bozorni himoya qilish va Rossiya sanoat korxonalarini xomashyo bilan uzluksiz taʼminlashga qaratilgan.
Cheklovlar toshkoʻmir va neft benzollariga, toluol, ortoksilol, paraksilol hamda fenolga nisbatan joriy etildi. Ushbu komponentlar mashinasozlikda — avtomobilsozlik, aviatsiya va kemasozlikda — lak-boʻyoq qoplamalari, oziq-ovqat qadoqlari, pol qoplamalari, kabel izolyatsiyasi va farmatsevtika mahsulotlarini ishlab chiqarish uchun asosiy xomashyo hisoblanadi.
Taqiq xalqaro tranzit tashuvlariga, gumanitar yordamga, shuningdek, Shpitsbergen arxipelagida faoliyat yurituvchi Rossiya tashkilotlarini taʼminlashga taalluqli emas.
