NYT: AQSh Nvidia chiplarini Xitoydagi qobiq kompaniyalarga yetkazishga ruxsat berdi
AQSh Moliya vazirligi Nvidia H200 akseleratorlarini xarid qilishga ruxsat bergan ayrim kompaniyalar sanksiyaga uchragan tuzilmalar bilan ham bogʻliq boʻlib chiqdi
AQSh regulyatorlari qariyb ikki oʻnlab xitoylik kompaniyaga Nvidia H200 akseleratorlarini xarid qilish yoki ularga xizmat koʻrsatish uchun ruxsat berdi. The New York Times surishtiruvida ruxsat oluvchilar orasida boʻsh turgan xonalarda roʻyxatdan oʻtgan firmalar, shuningdek, Xitoy harbiylari bilan hamkorlik qilgani uchun AQSh sanksiyalariga uchragan tashkilotlar bilan bogʻliq kompaniyalar borligi aniqlandi.
Pekinda roʻyxatdan oʻtgan New Matrix kompaniyasining ofisi boʻsh chiqdi: u yerda na peshlavha, na faoliyat alomatlari bor edi. Kompaniya taxminan 17 oy avval tashkil etilgan va AQSh 2024 yilda qora roʻyxatga kiritgan Wise Road investitsiya fondi bilan bogʻliq. Ruxsat olgan boshqa kompaniya — Maginfra — amalda tashlab qoʻyilgan ofisda roʻyxatdan oʻtgan. Tahlilchilar uning avvalroq AQSh cheklovlariga tushgan server ishlab chiqaruvchisi Inspur bilan bogʻliq boʻlishi mumkinligini taxmin qilmoqda.
New Matrix va Maginfra akseleratorlardan oʻz ehtiyojlari uchun foydalanishga emas, balki nomi koʻrsatilmagan buyurtmachilar uchun H200 oʻrnatilgan serverlarni yigʻishga litsenziya oldi. Ruxsat oluvchilar orasida provayderning maʼlumotlar markazlarida faoliyat yuritadigan Zhejiang Yindun Cloud Technology ham bor. Mazkur provayder mintaqaviy mudofaa idoralari va harbiy sunʼiy yoʻldosh tarmoqlariga xizmat koʻrsatadi.
Harbiy aloqa va kriptografiya sohalarida ishlaydigan, davlat tuzilmalari bilan bogʻliq kompaniyalar ham ruxsat oldi. AQSh Milliy xavfsizlik kengashining Xitoy boʻyicha sobiq direktori Lisa Tobin Savdo vazirligi va Nvidia taʼminot zanjirlarining yakuniy ishtirokchilarini yetarlicha sinchiklab tekshirmayotganini aytdi. Bu masala Nvidia rahbari Jensen Huangning amerikalik qonunchilar uchun 18 noyabrga rejalashtirilgan yopiq brifingida koʻtarilishi mumkin.
