Global chiplar bozoridagi jadal oʻsish fonida TSMCning oktabrdagi savdolari keskin oshdi
Tayvandan elektron komponentlar eksporti 61,4 foizga oʻsdi
Daromadning oʻsishiga ilgʻor yarimoʻtkazgichlarga boʻlgan yuqori talab sabab boʻldi. Yirik texnologik kompaniyalar sunʼiy intellektga faol sarmoya kiritishda davom etmoqda va shu orqali chiplar bozorini qoʻllab-quvvatlamoqda.
Oʻtgan oy TSMC uchinchi chorakda 763,1 mlrd yangi Tayvan dollariga teng rekord sof foyda olgani haqida hisobot berdi. Bu koʻrsatkich kutilganidan yuqori boʻldi, kompaniyaning operatsion marjasi esa 58,7 foizni tashkil etib, oʻz prognozining yuqori chegarasidan oshdi.
Kompaniya 2026–2028-yillarda kapital xarajatlari avvalgi uch yildagi darajadan sezilarli yuqori boʻlishini kutmoqda. Bu investitsiyalar buyurtmachilar tomonidan talabni qoʻllab-quvvatlash davom etayotgani bilan bogʻliq.
Tayvan bozoridagi oʻzgaruvchanlik fonida TSMC aksiyalari seshanba kungi savdolarni 2,24 foiz oʻsish bilan yakunladi. Avvalroq orolning moliyaviy regulyatori qisqa sotuvlarga qoʻyilgan cheklovlarni kuchaytirgan edi: dushanbadan boshlab bunday kunlik birja ichidagi buyurtmalar limiti 30 foizdan 3 foizgacha pasaytirildi.
Hukumat maʼlumotlariga koʻra, Tayvan eksporti oktabr oyida yillik hisobda 58,9 foizga oʻsib, 96,76 mlrd dollarga yetdi. Oʻsishga ilgʻor chiplarga boʻlgan talab yordam berdi: elektron komponentlar eksporti 61,4 foizga oshdi.
