Airbnb 2027-yilda sunʼiy intellektga asoslangan sayohat agentini ishga tushirishni rejalashtirmoqda
Xizmat real vaqt rejimida sahifaga xaritalar, fotosuratlar, marshrutlar va taqqoslashlarni qoʻshishi mumkin boʻladi
Kompaniya 2026-yil III choragi moliyaviy natijalari bilan birga eʼlon qilingan aksiyadorlarga maktubida yangi xizmat ustida ish olib borayotganini maʼlum qildi. Airbnb odatiy chatbot sayohatni rejalashtirish uchun mos emas, deb hisoblaydi. Shu sababli kompaniya foydalanuvchi soʻroviga moslashadigan interfeys yaratmoqda.
Xizmat real vaqt rejimida sahifaga xaritalar, fotosuratlar, marshrutlar va taqqoslashlarni qoʻshishi mumkin boʻladi. Airbnb, shuningdek, foydalanuvchilar amallarni bevosita shu interfeys orqali bajara olishiga umid qilmoqda. Kompaniya turar joylarni bron qilish va platformaning boshqa xizmatlaridan foydalanish imkoniyati unda boshidanoq boʻladimi-yoʻqmi, aniqlik kiritmadi.
Kelgusida Airbnb mehmonlarga butun safarni — uylar va mehmonxonalarni tanlashdan tortib xizmatlar hamda taassurotlargacha — rejalashtirish uchun yagona makon taqdim etmoqchi. Hozir platformada boshqa sunʼiy intellekt funksiyalari ham qoʻllanmoqda: tabiiy tildagi soʻrovlar boʻyicha qidiruv va eʼlonlar uchun avtomatik yaratiladigan tavsiflar. Kompaniya bu funksiyalarni bir necha oy oldin ishga tushirgan.
