Oʻnlab million yevro: muzlatkichlarga buzib kirish Yevropaga qancha zarar keltirdi
Kiberhujum Yevropa mamlakatlaridagi 115 dan ortiq supermarketda muzlatkichlarning ishlashini izdan chiqardi
Oktyabr va noyabr boshida Yevropa supermarketlarining sovutish tizimlariga uyushtirilgan keng koʻlamli kiberhujumlar oqibatida mahsulotlarning buzilishi Yevropaga oʻnlab million yevroga tushgani baholanmoqda. Zarar koʻrgan yuzlab savdo nuqtalari turli davlatlarda joylashgani sababli zararning aniq umumlashtirilgan miqdori hali hisoblab chiqilmoqda.
Birinchi toʻlqin (2026-yil oktabr oʻrtalari) Fransiyada jamlanib, mamlakatdagi eng yirik tarmoqlarning (Carrefour, Intermarché, Netto, Monoprix, Coopérative U) qariyb 700 ta supermarketidagi muzlatkichlarni ishdan chiqardi. Sovutish kameralaridagi harorat xakerlar tomonidan bir necha soat davomida majburan +50 °C gacha koʻtarilgani sababli mahsulotlar ommaviy ravishda buzildi. Faqat Fransiyaning oʻzidagi zarar bir necha million yevroga baholanmoqda (masalan, Elzas mintaqasidagi atigi ikki doʻkon qariyb 270 ming yevro zarar koʻrgan).
Ikkinchi toʻlqin (2026-yil 2-noyabrga oʻtar kechasi): eskirgan Danfoss dasturiy taʼminotidagi zaifliklar orqali amalga oshirilgan shunga oʻxshash buzib kirish Yevropaning 7 dan 10 tagacha mamlakatini, jumladan, Shvetsiya, Finlyandiya, Belgiya, Irlandiya, Italiya, Niderlandiya, Lyuksemburg, Estoniya va Portugaliyani qamrab oldi. Yuzlab doʻkonlar (Spar, Carrefour, Coop, Delhaize, ICA, SuperValu tarmoqlari) zarar koʻrdi. Har bir alohida yirik savdo nuqtasining zarari oʻn minglab yevro bilan oʻlchanadi (masalan, Belgiyaning Delhaize chakana savdo tarmogʻi 100 ming yevrolik mahsulot yoʻqotilganini maʼlum qildi, Belgiyadagi kichik doʻkonlardan biri esa 60 ming yevrolik oziq-ovqatni tashlab yubordi). Bu toʻlqin keltirgan umumiy zarar ham oʻnlab million yevroni tashkil etdi.
Qishloq xoʻjaligi va oziq-ovqat masalalari boʻyicha Yevrokomissar Kristof Xansen yuz bergan voqeani oziq-ovqat taʼminoti zanjirlarini ataylab izdan chiqarishga urinish deb atadi. U Yevropa Ittifoqida mahsulot taqchilligi yoʻqligini, biroq biznes uchun moliyaviy zarar nihoyatda ogʻir boʻlganini taʼkidladi.
